भरतपुरमा रेणु दाहालले जित्ने लगभग पक्का ,मतगणना हिजो राति ८ बजेबाट भएको

भरतपुर । चितवनस्थित भरतपुर महानगरपालिकाको मेयर पदमा कांग्रेस–माओवादी गठबन्धनकी उम्मेदवार एवं प्रचण्डपुत्री रेणु दाहालको जित करिब सुनिश्चितजस्तै भएको छ ।

वडा नम्बर १९ मा आज भइरहेको पुनःमतदानको माहोलले रेणु जित्ने पक्कापक्की भएको हो । रेणुलाई जिताउन पूर्व सांसद एवं प्रचण्डका भाई नारायण दाहालदेखि केन्द्रीयस्तरका नेतासम्म खटिएका छन् ।

कांग्रेस माओवादी गठबन्धनले मतदाता मतदानस्थलसम्म पुर्याउन गाडीको व्यवस्था गरेको छ । गाडीको सुविधान पाउँदा कांग्रेस र माओवादी समर्थित धेरै मतदाताले आज भोट खसालेको माओवादी नेता नारायण दाहाल बताउँछन् । यसकारण पनि जित निश्चित भएको उनको विश्वास छ ।

भरतपुरमा कुनैहालतमा रेणु दाहाल जित्ने कांग्रेस र माओवादी कार्यकर्ताको दाबी छ । यता रेणुको जितको माहोल देखेर प्रतिस्पर्धी एमालेमा भने चिन्ता सुरु भएको छ ।

राति ८ बजेबाट मतगणना

यसैबीच भरतपुरको १९ नम्बर वडामा आज राति ८ बजेबाट मतगणन सुरु हुने निर्वाचन अधिकृतको कार्यालयले जनाएको छ । भरतपुरमा २० नम्बर वडाको मत गन्न बाँकी नै छ । दुबै वडाको नतिजा सोमबारसम्म आउने निर्वाचन कार्यालयले जनाएको छ ।

शुक्रबार, साउन २1, २०७४ मा प्रकाशित