राहतमा राजनीतिः भोट हाल्नेलाई खातैखात, नहाल्नेको रित्तो हात

जनप्रतिनिधिको तिखो वचन – भोट अर्कैलाई हाल्ने, राहत हामीसँग माग्ने ?

७ भदौ, सुनसरी । सुनसरी सदरमुकामसमेत रहेको इनरुवा नगरपालिका–१० कि कुसमीदेवी रामको एक हप्ता अगाडि आएको विनाशकारी बाढीले घरमा भएको सबै थोक बगायो । तर उनले अहिलेसम्म राहत पाउन सकेकी छैनन् !कारण थियो, उनले दोस्रो चरणको स्थानीय तहमा गरेको मतदान । आफू एक पार्टीमा सक्रिय भएको र आफ्नो वडामा अर्कै पार्टी विजयी भएका कारण आफूलाई राहत नदिएको उनले गुनासो गरिन् । कुसुमदेवीकै जस्तो गुनासो अर्की बाढीपीडित भनमन्ता रामको पनि छ । उनले पनि एक साता अगाडि आएको बाढीबाट पूर्ण प्रभावित भए पनि राजनीतिमा फरक आस्थाकै कारण राहत पाएकी छैनन् । राहतमा भएको विभेदका प्रतिनिधि पात्र मात्रै हुन् यी दुई । इनरुवा–१० जल्पापुरमा रहेका करिब ३० परिवारले अहिलेसम्म राहत पाएको छैन । सबैको कारण एउटै हो–स्थानीय तहको निर्वाचनमा अर्कै पार्टीलाई गरेको मतदान । एक साता अगाडि आएको बाढीबाट पीडित बनेर भोकभोकै बस्दासमेत आफूहरुलाई राजनीतिक र जातीय विभेद गरेको तथा चुनावमा भोट नदिएको भन्दै जनप्रतिनिधिले समेत विभेद गरेको स्थानीय सुवालाल रामले बताए ।

यो सामाग्री पनि पढ्नुहोस् !!

मधेशमा राजपाको वितण्डा सुरु; एमाले र राप्रपा को झण्डा जलाईयो !

वडामा नेकपा (एमाले) विजयी भयो, तर वडा अध्यक्षले राहतै नदिएको स्थानीय मोहमद जावेद अख्तर बताउँछन् । यता वडा अध्यक्ष मोहमद सुल्तान त्यो कुरालाई ठाडै अस्वीकार गर्छन् । आफूले वडागतरुपमा राहत वितरण गर्दै आएको उनले बताए । आफूले राहतमा कुनै राजनीति नगरेको उनले बताए । आफूले क्रमिकरुपमा राहत वितरण गर्ने कामलाई निरन्तरता दिएको उनले प्रतिक्रिया दिए । तर वडा अध्यक्ष सुल्तानको कुरालाई स्वीकार गर्न तयार छैनन् स्थानीय । आफू राहत वितरण गरिरहेको बेला राहतका लागि वडा कार्यालयमा गएको र राहत माग्दा तैले अर्कै पार्टीलाई मतदान गरेका कारण दिन नमिल्ने प्रतिक्रिया पाएको रामले दुखेसो पोखिन् । गाउँमा सञ्चारकर्मी पुग्दा पीडित रुवाबासी गर्दै र केही भक्कानिँदै आफूहरुलाई राहत र बसोबासको वातावरण मिलाइदिन माग गरेका थिए । त्यसैले दुःख परेको बेला कसैलाई विभेद नगरी राहत वितरण गर्नु पर्ने आवश्यकता देखिएको छ । ( अनलाईन खबर डटकम बाट साभार गरिएको , स्रोत सामाग्री हेर्न यहाँ क्लिक गर्नुहोला )