धन कमाउन दुबई पुगेका चितवने जोडीको रहस्यमय मृत्यु

वैदेशिक रोजगारीको लागि दुबई गएका एक सापकोटा दम्पतिको दुबईमा रहस्यमय मुत्यु भएको छ । चितवनको रत्ननगर नगरपालिका वडा नं. ६ बछौली निवासी परशुराम सापकोटा (कृष्ण) र उनकी श्रीमती कल्पना सापकोटाको गत शनिबार रहस्यमय मृत्यु भएको हो । दुबईको देरहा शहरको एउटा कोठामा उनीहरु मृत फेला परेका हुन् । पशुराम झुण्डिएको र कल्पनाको घाँटी काटिएको अवस्थामा भेटिएको परिवार निकट स्रोतले बताएको छ । तर, परशुरामका आफन्तहरुले भने दम्पतिको हत्या भएको आशंका गरेका छन् । घटना शनिबार नेपाली समय अनुसार दिउँसो २ बजे देखि राति ८ बजेको बीचमा भएको हो । भाई नवराज दुवाडीले भिसा पठाएर कल्पना २०७१ साल मंसिरमा दुबई गएकी हुन् भने परशुराम श्रीमती कल्पनाले भिसा पठाएर एक बर्र्षपछि सोही देशमा गएका थिए । कल्पनाले जुस कम्पनी र परशुरामले होटलमा कुक हेल्परको काम गर्दैैै आएका थिए । स्वदेशमै हुँदा श्रीमान श्रीमतीको बेमेल थियो । विदेश गएपछि पनि उनीहरु बीच लामो समयसम्म आत्मियता हुन सकेन ।

यो सामाग्री पनि पढ्नुहोस् : 

मलाई कुनै दल विशेषको होइन, नेपाली हुनुमा गर्व छ : सागर आले

विदेश गएको करिब साढे एक वर्षसम्म छुट्टाछुट्टै बसेका दुई श्रीमानश्रीमतीको तीन महिना अघिमात्र नवराजले मेलमिलाप गराएर एउटै कोठामा बस्दै आएका थिए । दुबईमा रहेका अफन्तहरुसँग कोठामा बसेर खाजा खाएर काममा जान बिदाई भएपछि घटना भएको दुबईबाट जानकारी प्राप्त भएको छ । घटनाको विषयमा नवराजले परशुरामका बुवा मोती सापकोटालाई आइतबार जानकारी गराएका थिए । नवराजले कल्पना छेदविच्छेद र परशुराम झुण्डिएको अवस्थामा फेला परेको जानकारी दिएको बुवा मोती सापकोटाले बताए । परशुरामका आफन्तले भने छोराबुहारीको हत्या भएको आशंका गरेका छन् । छोरा पशुरामले पटकपटक फोन गरेर आफूलाई मार्ने प्रयास गरेको भनेर बताउने गरेको बाबु मोतीले बताए । छोराले फोनमा मलाई मार्ने षडयन्त्र भइरहेको छ भन्थ्यो मोतीले भने मैले घर फर्की भने तर मानेन,ज्यानै फाल्यो । कल्पनाले करिब तीन वर्षसम्म कमाएको एक पैसा पनि घर पठाएकी छैनन् । उनले कमाएको पैसा दुबई मै रहेका माईतीले खाएको र सोही पैसाकै कारणले श्रीमान श्रीमतीलाई नै मारेको हुन सक्ने आशंका परिवारजनले गरेका छन् ।

घटना आर्थिक लेनदेन र श्रीमान श्रीमती बीचको खटपटले भएको हुन सक्ने अनुमान गाउँलेले गरेका छन् । ‘पाँच दिनअघि वैशाखमा आउछौं भनेर फोन गरेका थिए’, मोतीले भने, ‘फोन गरेको पाँच दिनपछि संसारमै छैनन् भनेर खबर आयो ।’ सापकोटा दम्पतिकी दुई छोरा रहेका छन् । १४ बर्षको छोरा अभिषेक कक्षा ८ मा र ११ वर्षका कान्छा छोरा अनुप कक्षा ४ मा पढ्दै छन् । पैसा कमाउन विदेश गएका छोराबुहारीको रहस्यमय मृत्यु भएको खबरले आमा मिसकुमारी अचेत अवस्थामा पुगेकी छन् । छोरा बुहारीको मृत्यूको खबरले परिवार शोकमा डुबेको छ । ( होमनाथ सापकोटाले लेख्नुभएको यो सामाग्री ईचितवन पोष्ट डटकम बाट साभार गरिएको हो , श्रोत सामाग्री हेर्न यहाँ क्लिक गर्नुहोला )