नेपाल आइडलबाट सुरज थापा बाहिरिए

         काठमाडौं : नेपाली टेलिभिजनको इतिहासमै सर्वाधिक रुचाइएको एपीवान टेलिभिजनको प्रस्तुति गायन रियालिटी सो नेपाल आइडल प्रतियोगिताको उत्कृष्ट छबाट सुरज थापा बाहिरिएका छन्।नेपाल आइडलमा उत्कृष्ट छसम्मको यात्रा तय गरेका थापा आधुनिक, सेमी क्लासिक र सेन्टिमेन्टल गीत मन पराउँछन्।
राजधानीबाट अडिसन दिएका नेपालगन्जका सुरज थापा नेपाल आइडलमा उत्कृष्ट ६ सम्म आइपुगेका हुन् । नेपाल आइडलजस्तो विख्यात स्टेजमा उभिएर उत्कृष्ट ६ सम्मको यात्रा तय गर्नु चानचुने विषय होइन । यो उपलब्धिबाट उनी पनि निकै खुसी र उत्साहित छन् । सुरज रेडियो नेपालमा पुराना कलाकारका गीत सुनेर गीतसंगीतप्रति आकर्षित भएका हुन् । ३० वर्षीय उनले आईए गरेका छन् ।
टप ६ बाट बाहिरिएका सुरज आधुनिक, सेमी क्लासिक र सेन्टिमेन्टल गीत मन पराउँछन्। उनलाई पुराना पुस्तामा नारायणगोपाल, भक्तराज आचार्य एवं नयाँ पुस्तामा स्वरूपराज आचार्यको स्वर मन पर्छ। आफ्नो स्वरको स्तर, मेहनत र आत्मविश्वासका कारण नेपाल आइडलको यात्रा यहाँसम्म पुगेको उनको भनाइ छ। नेपाल आइडल उपाधिका लागि प्रतियोगीहरू जति नजिक आउँदैछन् उनीहरूको चर्चा र लोकप्रियता उत्तिकै बढ्दै छ । यो गायन रियालिटी सो हजारौं युवाको सपना बनेको छ ।

पहिलो नेपाल आइडलको उपाधि विजेता चयन नहुँदै दोस्रो सिजनको तयारीमा लाग्नेहरू हजारौं छन् । नेपाल आइडलमा अब ललितपुरका २२ वर्षीय प्रदाप दास, बुटवलकी २१ वर्षीया सुजाता पाण्डेय, मोरङका २१ वर्षीय निशान भट्टराई, चितवनका २० वर्षीय सागर आलेमगर र पोखराका २० वर्षीय बुुद्ध लामा उत्कृष्ट पाँचमा पर्न सफल भएका छन्।
नारायणगोपाल र कर्णदासको स्वर मन पराउने प्रताप आफ्नो एकमात्र लक्ष्य नेपाल आइडल बन्ने रहेको बताउँछन्। पारिवारिक वातावरण नै सांगीतिक भएकाले आफूलाई यस क्षेत्रमा लाग्न सजिलो भएको उनको भनाइ छ।
उत्कृष्ट पाँचमा परेकी एकमात्र महिला प्रतियोगी सुजाता पाण्डेय अरुणा लामा, तारादेवी र नयाँ पुस्तामा मेलिना राईको स्वर मन पराउँछिन्। बुटवलबाट अडिसन दिएकी उनी मेहनत र दर्शकको मायाका कारण यो स्थानसम्म आएको बताउँछिन्।
बुटवलमा हुँदा बागेश्वरी संगीतालयमा शास्त्रीय संगीत सिकेकी उनको पनि लक्ष्य जित नै हो। प्रतियोगिताका प्रबल दाबेदारमध्ये एक हुन् निशान भट्टराई।
गजल र आधुनिक शैलीका गीत मन पराउने उनी सबै खाले गीत गाउन सक्छन् । सानैदेखि गीतसंगीतप्रति अगाध रुचि एवं परिवारको साथ र सहयोगले गायन क्षेत्रमा लाग्न आफूलाई सहज भएको उनको भनाइ छ।
अहिलेसम्म औपचारिक रूपमा संगीत नसिकेका सागर नयाँ शैलीको आफ्नो स्वर, मेहनत र सबैको साथले नेपाल आइडलमा उत्कृष्ट पाँच सम्मको यात्रा तय गर्न सकेको बताउँछन्। परिवारमा सांगीतिक वातावरण भएकाले यस क्षेत्रमा आफूलाई सजिलो भएको उनको भनाइ छ।
अहिलेसम्म बटम लाइनमा नपरेका पोखराका बुद्ध लामा नेपाल आइडलका अर्का प्रबल दाबेदारका रूपमा देखा परेका छन्। परिवार खासगरी दिदी र दाइका कारण गायनमा लागेका उनी पुराना र आधुनिक शैलीका गीत बढी मन पराउँछन्।