उपाधि नजिक नेपाल

भाद्र १०, २०७४- ‘नतिजाले नेपाल विजयी देखाए पनि खेलको स्थिति अर्कै थियो ।’ बंगलादेशका प्रशिक्षक मोस्ताफा अनोवर परवेजले खेलपछि दिएको यो अभिव्यक्तिले खेलको प्रस्ट बयान गर्छ । यद्यपि नेपालका प्रशिक्षक सुनील श्रेष्ठले टोलीको प्रदर्शनबाट आफू सन्तुष्ट रहेको बताएका छन् ।
साफ यू–१५ च्याम्पियनसिपअन्तर्गत शुक्रबार सेमिफाइनलमा नेपालले बंगलादेशलाई ४–२ ले पराजित गरेको थियो । एक समय ३–० को अग्रता बनाएको नेपाल ५० सेकेन्ड अन्तरमा दुई गोल खाएपछि अन्तिम २० मिनेट बंगलादेशको दबाबमा रह्यो ।
नेपालले खेलको छैटौं मिनेटमा आकाश बुढामगरको गोलमा अग्रता लियो । दायाँ विंग्सबाट डिफेन्डर रन्दिप पौडेलले गरेको क्रसलाई बंगाली डिफेन्डर सादेकुजामान फाहिमले रोकेर क्लियर गर्न सकेनन् । सिक्स यार्ड बक्सबाहिर फाहिमले गरेको गल्तीको फाइदा उठाउँदै आकाशले नेपाललाई अग्रता दिलाए । १५ औं मिनेटमा नेपालले अर्को अवसर सिर्जना गर्‍यो । दर्शन गुरुङको कर्नरमा रन्जन पुनको हेडरलाई बंगलादेशका यासिन अराफातले गोललाइनबाट क्लियर गरिदिए ।
खेलले आधा घण्टाको समय छुँदा नेपालले अग्रता बढायो । दर्शनले पेनाल्टी बक्सको दायाँ भागबाट दिएको क्रसमा दीपक भण्डाराको हेडर गोलरक्षक इमोन हवल्दार र फाहिमको बीचबाट छिरेपछि आकाशले खाली पोस्टमा गोल गरे । इमोन र फाहिमले एक आपसमा समझदारी गर्न नसक्दा आकाश भाग्यमानी साबित भए ।
पहिलो हाफको अन्तिम मिनेटमा फोयसल अहमद फाहिमले बंगलादेशलाई खेलमा फर्काउने अवसर गुमाए । उनले पेनाल्टी बक्स बाहिरबाट चार डिफेन्डर छक्याउँदै ल्याएको बललाई सिक्स यार्ड बक्सबाट पोस्टको दिशा दिन सकेनन् ।
मध्यान्तरमा २–० ले पछि परेको बंगलादेशले दोस्रो हाफको सुरुआतमै अर्को मौका गुमायो । नेपालका गोलरक्षक विशाल सुनारले क्लियर गरेको ब्याकपास सिधै बंगलादेशका उज्जल हुसेनको खुट्टामा पुग्यो । तर उज्जलले हतारमा गरेको प्रहार भाग्यवश सिधै विशालकै हातमा पुग्यो ।
खेलको ६५ औं मिनेटमा नेपाल ३–० को अग्रता कायम गर्न सफल भयो । वैकल्पिक खेलाडी कार्लोस बखारियाले बायाँ विंग्सबाट गरेको क्रस बेन्चबाट आएका बंगाली डिफेन्डर नजमुल विश्वासले क्लियर गर्न खोज्दा आफ्नै पोस्टमा गोल गरे ।
७३ औं मिनेटमा बंगलादेशले खेलमा फर्कने आस जगायो । फोयसलले मोहमद राजा शेखसँग छोटो फ्रिकिकमा वान–टु पास खेल्दै दर्शनीय गोल गरे । त्यसको ५० सेकेन्डमै नेपालले दोस्रो गोल खायो । पहिलो गोल खाएर सेन्टरबाट बल चालेको १७ सेकेन्डमै नेपालको अग्रता घटेको थियो । उज्जलले बक्सभित्र गोलरक्षकलाई बिट गरेको पास असिम गुरुङले क्लियर गर्न खोज्दा आफ्नै पोस्टमा लागेर फर्कियो । त्यसपछि गोललाइनमा दुवै टोलीका खेलाडीको भीडभाड बढेपछि ११ मिनेटअघि मैदान छिरेका हबिबुर रहमानले बललाई पोस्टको दिशा दिए ।
लगातार दुई गोल गरेको बंगलादेशले नेपालमाथि लगातार दबाब सिर्जना गर्दै आक्रमण बुन्न थाल्यो । विगतका खेलको तुलनामा केही सुधारिएको नेपाली डिफेन्सले लगातार बंगलादेशको रणनीति विफल पार्‍यो । दोस्रो हाफमा थपिएको ६ मिनेट इन्ज्युरी टाइमको अन्तिम मिनेटमा नेपालले अर्को गोल गर्‍यो । खेलकै अन्तिम प्रहारलाई विर्जेश चौधरीले गोलमा परिणत गरे । उनले रन्दिपले दायाँबाट दिएको पास सदुपयोग गर्दै नेपालको फाइनल यात्रा सुनिश्चित गरे । नेपालले फाइनलमा छिमेकी भारतसँग खेल्नेछ ।
शुक्रबारै अर्को सेमिफाइनलमा भारतले भुटानलाई ३–० ले पराजित गर्दै नेपालविरुद्धको फाइनल पक्का गरेको हो । कप्तान विक्रमप्रताप सिंहले २० औं मिनेटमा गरेको गोलमा भारतले मध्यान्तरसम्म १–० को अग्रता बनायो । दोस्रो हाफमा वैकल्पिक खेलाडी हरप्रित सिंहले ७५ औं मिनेटमा अग्रता दोब्बर पारे । अन्तिम मिनेटमा मेल्भिन डेमेल्लोले गोल गरेर भारतको जित सुनिश्चित बनाए । 

सुनील श्रेष्ठ, प्रशिक्षक, नेपाल 
खेलाडीले राम्रै प्रदर्शन गरे । म सन्तुष्ट छु । अन्त्यतिर ३–० ले अगाडि भएपछि खेलाडीहरू अलि बढी आक्रामक हुँदा सम्हालिन सकेनन् । लगातार गोल खाएपछि केही दबाब पर्‍यो तर नतिजा आफ्नो पक्षमा पार्न सफल भयौं । हाम्रो रणनीति केही हदसम्म सफल भयो । 

मोस्ताफा अनोवर परवेज, प्रशिक्षक, बंगलादेश 
हामीले खेलभर थुप्रै अवसर सिर्जना गरे पनि गोल गर्न सकेनौं । हाम्रो डिफेन्समा भएका मूर्खतापूर्ण गल्तीकै कारण नेपाललाई उपहारस्वरुप गोल दियौं । नेपालको पक्षमा नतिजा परे पनि खेलको स्थिति अर्कै थियो । हाम्रो खराब दिन रह्यो ।

रोशन रानामगर, कप्तान, नेपाल 
यहाँसम्म आउन टोलीले निकै मिहिनेत गरेको छ । फाइनलमा भारतसँग खेल्न पाउनुलाई हामीले अवसरका रूपमा लिएका छौं । फाइनलमा इतिहास रच्दै आफ्नो मिहिनेत सार्थक तुल्याउने लक्ष्य छ । हामी एकढिक्का भएर सुरुदेखि नै लागेका थियौं । त्यसैअनुसार फाइनल सुखद हुन्छ भन्ने अपेक्षा छ ।’