नेपाली झोल ममले अमेरिकामा पिट्यो तहल्का, अमेरिकी मिडियामा चर्चित

    

जानुका आफ्ना श्रीमान् मुकुन्द मास्केका साथ न्युयोर्क बस्न थालेको ३ वर्षभन्दा बढी भएको थियो । यसघि ज्याक्सन हाइट्समै रहेका ‘हाम्रो भिम्स क्याफे’ मा उनले एक वर्ष जति काम गरेकी थिइन् । त्यही कामले उनलाई न्युयोर्क शहरमा रेस्टुरेन्ट व्यवसायका बारेमा जान्ने मौका मिलेको थियो । उता उनको श्रीमान पनि न्युयोर्ककै म्यानहृयाटनमा एक इन्डियन रेस्टुरेन्टमा काम गर्थे र अझै गर्छन् ।

यो जोडीले आफ्नै रेस्टुरेन्ट व्यवसाय शुरु गर्ने विचार गरिरहेका थिए । त्यहिबेला उनीहरुको पुरानो साथी, नरेन्द्रलामा र सुभाष लामासँग उनीहरुको कुरा हुन्छ ।

‘हामी उहाँहरुलाई नेपालदेखि नै चिन्थ्यौं’, जानुकाले भनिन् । ‘हामी सबैसँग रेस्टुरेन्टमा काम गरेको अनुभव पनि थियो ।’

नरेन्द्रसँग १३ वर्षभन्दा बढी रेस्टुरेन्टमा काम गरेको अनुभव थियो । उनी यसअघि फिलाडेल्फिया शहरमा १३ वर्ष सेफको रुपमा काम गरिसकेका थिए भने ३ वर्ष न्युयोर्कमै काम गरेका थिए । उता नाताले उनको दाजु सुभाषको नेपालमा रेस्टुरेन्ट थियो ।

त्यो भेटले उनीहरुलाई अब आफ्नै व्यवसाय चलाउने हुटुहुटी चल्न थाल्यो ।

‘न्युयोर्क शहरमा अलि राम्रो र सस्तो ठाउँ पाउन निकै नै गाह्रो छ’, जानुकाले भनिन् । ‘भाग्यले यो ठाउँ पाइयो किनभने यस रेस्टुरेन्टका मालिक यो रेस्टुरेन्ट बेच्ने तरखमा थिए ।’

उनीहरुका लागि उक्त रेस्टुरेन्टको लोकेशन पनि एकदमै राम्रो थियो । ‘यो ठाउँ नेपालीहरु ब्ाढी जाने ज्याक्सन हाइट्सको नजिक भएकाले पनि हामीलाई मन परेको हो’, जानुकाले भनिन् ।

ज्याक्सन हाइट्समा मात्रै कम्तिमा ५ वटा त नेपाली रेस्टुरेन्टहरु छन् । ‘हामीले ठाउँ त पायौं, तर अब खानेकुरा के-के राख्ने भन्नेबारे हामी अलमलमा थियौं’, जानुकाले भनिन् ।

‘त्यहीबेला झोल ममको आइडिया फुर्‍यो ।’

यो आइडिया उनीहरुका लागि अलि जोखिमको आइडिया थियो किनभने १५ वर्षभन्दा बढी भइसकेको थियो त्यस शहरमा नेपाली रेस्टुरेन्ट खोलिएको । तर अहिलेसम्म पनि कसैले झोल मम भने राखेका थिएनन् । रेगुलर मम त सबैको अनिवार्य नै भइहाल्यो ।

‘हामीलाई आशा चाहिँ थियो कि यो चल्छ भनेर,’ जानुकाले भनिन् । ‘हामी नेपालीलाई झोल मम खुब मिठो लाग्छ ।’

फेसबुक लाइभ

उनीहरुको आशा निराशामा बदलिएन । झोल ममको माउथ पब्लिसिटीले उनीहरुको व्यवसाय बढ्न थाल्यो । अझ फेब्रुअरी ७ तारिखका दिन स्थानीय नेपाली पत्रकार आङ्गकामी शेर्पाले फेसबुक लाइभ बाट उनको प्रचार गरिदिए । उक्त भिडियो मात्रै २१ हजारभन्दा बढीले हेरिसकेका थिए ।

‘त्यो फेसबुक लाइभले त जादु नै गर्‍यो,’ जानुकाले भनिन् । ‘मानिसहरु क्यालिफोर्निया, भर्जिनिया र डीसीदेखि यहाँ झोल मम खान आइपुगे । ‘

‘त्यतिखेर त हामीले टोकन सिस्टम नै सुरु गरेका थियौं किनभने ग्राहकको लामो लाइन हुन्थ्यो त्यतिबेला,’ जानुकाले थपिन् ।

त्यतिखेर दिनको ३०० प्लेट झोल मम बिक्री हुने गरेको उनले बताइन् । ‘त्यो दिन सम्झँदा अहिले पनि अचम्मै लाग्छ ।’ जानुकाले थपिन् ।

२६ वर्षे निरज शाह ममचायका नियमित ग्राहक हुन् । उनी त्यहाँ प्रायः हप्तामा एकपटक आउने गर्छन् । ‘मलाई यो ठाउँका बारेमा साथीले भनेको थियो’, निरजले भने, ‘यहाँको झोल मलाई निकै मीठो लाग्छ ।’

‘मममा सबैभन्दा महत्वपूर्ण कुरा भनेकै झोल हो’, जानुकाले निरजको कुरामा प्रतिक्रिया जनाइन्, ‘झोलको रेसिपी त म तपाईलाई भन्दिन नि’ जानुकाले हाँस्दै भनिन् ।

उनीहरुको आइडिया पछ्याए अरुले पनि

उक्त रेस्टुरेन्टको सफलता देखेर न्युयोर्कका अरु रेस्टुरेन्टले पनि झोल मम राख्न सुरु गरे । न्युयोर्कको लगभग सबै नेपाली रेस्टुरेन्टमा झोल मम अहिले राखिएको छ ।

झोल ममको माहौल

ज्याक्सन हाइट्समा रहेको ‘नमस्ते तासि डेले’ रेस्टुरेन्टका सञ्चालक मोहन बरुवालले पनि झोल मम राखेका छन् । ममचायको सफलता देखेरै उनले पनि आफ्नो रेस्टुरेन्टमा झोल माम राख्न थालेको स्वीकारे ।

सन् २००७ देखि उनले रेस्टुरेन्ट त्यहाँ चलाउन थालेका हुन् । ‘मैले झोल ममका बारेमा पहिला त्यति चासो नदिएकै हो किनभने हामी चारथरिका मम त सधैं दिइ नै रहेका थियौं’ मोहनले भने ।

‘एकदिन मेरो एक ग्राहकले ‘झोल मम यहाँ पाइन्छ? ‘ भनेर सोधे, मोहनले भने, ‘उनलाई मैले ‘कहाँ पाइन्छ र झोल मम ?’ भन्दा उनले ममचायका बारेमा मलाई जानकारी दिए । यसरी ग्राहक आफैं सोध्न आएपछि मैले सोचें अब यहाँ पनि झोल मम सुरु गर्नुपर्छ ।’

अरु आइटम पनि पाइने उनको रेस्टुरेन्टमा झोल मम राखेपछि ममको बिक्री ५० प्रतिशतले बढेको छ ।

मोहनले जस्तै, ‘हाम्रो भिम्स क्याफे’ की सञ्चालिका ज्ञानु थापाले पनि साथी जानुकाको सफलता दखेर आफुले पनि झोल मम राखेको स्वीकारिन् ।

‘नढाँटी भन्दा मलाई शुरुमा झोल मम राखुँ कि नराखुँ भएको थियो’ उनले भनिन् । ‘तर मेरो साथीको सफलता देखेर मैले पनि राखें ।’

उनी दिनमा २०० प्लेट मम बेच्छिन् जसमा ७५ प्रतिशत झोल मम नै हुन्छ ।

उनको रेस्टुरेन्टमा झोल मम बाहेक चाउमिन, फ्राइड आलु, फ्राइड राइस पनि पाइन्छ । तर, प्रायः सबैले झोल मम नै माग्छन् ।

ज्याक्सन हाइट्समा रहेका अरु रेस्टुरेन्टहरु, कञ्चनजंघा रेस्टुरेन्ट र मम ब्रोजले पनि आफ्नो मेनुमा झोल मम राखिसकेका छन् ।

अन्य नेपाली रेस्टुरेन्टहरुले झोल मम आफ्नो मेनुमा राख्न नभ्याए पनि बेच्न भने शुरु गरिसकेका छन् ।

ज्याक्सन हाइट्स नजिकैको उडसाइड क्याफे त्यो मध्ये एक हो ।

७ वर्षअघि खोलिएको रेस्टुरेन्टका ५३ वर्षे सञ्चालक पुरुषोत्तम खड्गीले भने , ‘ग्राहकहरुले झोल मम डिमान्ड गर्न थालेपछि हामीले पनि यो बेच्न शुरु गर्‍याैं ।’

अगाडिको बाटो

जानुका अरु रेस्टुरेन्टले पनि झोल मम शुरु गरेकोमा खुसी त छिन् तर यसले उनको व्यवसायलाई असर भने गरिरहेको छ ।

‘सबैले झोल मम राखेका कारण ग्राहकहरु बाँडिएका छन्,’ उनले भनिन् ‘तर यसमा कसैको केही लाग्दैन, ठीकै छ ।’
यद्यपि उनीहरु सबैको व्यवसाय राम्रै चलिरहेको छ । जानुका भन्छिन्- अहिले हामी दैनिक २०० प्लेट झोल मम बेचिरहेका छौं ।’

उनको रेस्टुरेन्टमा चाउमिन, छोयला, सम्यबजी पनि पाइन्छ । तर, उनीहरुको मुख्य ध्यान भनेको झोल मम नै हो ।