भक्तपुरमा सूर्यविनायकसम्म चल्दै आएको साझा बस २१ असारदेखि पलासेसम्म सञ्चालनमा आउने

   

भक्तपुर, असार १८ । गत जेठ १० गतेदेखि भक्तपुरको सूर्यविनायकसम्म चल्दै आएको साझा बस आगामी २१ असारदेखि भने सूर्यविनायक नगरपालिका वडा नम्बर १० स्थित पलासेसम्मै चल्ने भएको छ । स्थानीय जनप्रतिनिधिको पहलमा साझा बस बुधबारदेखि पलासेसम्म सञ्चालनमा आउने भएको हो ।

काठमाडौँको स्वयम्भूदेखि भक्तपुरको सूर्यविनायकसम्म बिहानदेखि बस सञ्चालन हुँदै आएको छ । यो रुटमा २० वटा बस सञ्चालन भइरहेका छन् । सूर्यविनायकसम्म सञ्चालनमा ल्याएको करिब ४१ दिनपछि साझा बस काठमाडौदेखि पलासेसम्म सञ्चालन गर्ने सहमति भएको हो । सहमतीअनुसार बुधबारदेखि सञ्चालनमा आउँन लागेको जनाइएको छ ।

भक्तपुरबासीले भने साझा बस राजमार्ग आसपासमा मात्र नभई कमलविनायक, च्याम्हासिंह, दुधपाटीलगायतका रुटमा पनि सञ्चालनमा ल्याउन माग गरिरहेका छन् । साथै रात्रीकालीन सेवा पनि सञ्चालन गर्न स्थानीयले माग गरेका छन् । हाल साझा बस साझ ६ बजेसम्म मात्र भक्तपुरमा सञ्चालनमा आइरहेको छ ।