तीन बालबालिकाको एकैपटक हत्या : रहस्यमय बन्दै घटना, अरुण गाउँपालिकामा रुवावासी

 

भोजपुर, असार ३० – अरुण गाउँपालिका-१, प्याउलीको मरेङडाँडास्थित दुई घरका तीन बालबालिकाको एकै पटक भएको हत्या प्रकरण थप रहस्यमय बन्दै गएको छ । हत्या भएको तीन साता बितिसक्दा समेत घटनाको दोषी पहिचान गर्न नसक्नुले पीडित परिवारमाथि पीडा थपिएको छ ।
कसरी भयो हत्या ?
असार १० गते शनिबार बेलुका तीनै जना हराएका थिए । असार १२ गते सोमबार बिहान सवा सात बजेतिर स्थानीय तोरन कार्कीको माछापोखरीभित्र डुबेको अवस्थामा स्थानीय बासिन्दाले उनीहरुलाई फेला परेका थिए । अरुण गाउँपालिका–३ का १६ वर्षका रन्जिव सापकोटा, १४ वर्षका सुष्मा फुयाल र ८ वर्षका प्रदिप फुयाँल मृत भेटिएका हुन् । उनीहरुको घर र घटनास्थल मरेङडाँडा ढेडसय मिटरको दुरीमा पर्छ । शंकास्पद घटना भन्दै प्रहरीको अनुसन्धान व्युरोले अनुसन्धान जारी रहेको बताए पनि घटनाबारे यथार्थ आउन सकेको छैन । घटनापछि प्याउलीबजार र आसपासका बासिन्दा शोकमा डुबेका छन् । अरुण गाउँपालिकामा कसैको आशु ओभाएको छैन ।
रविन्द्र रन्जिव सापकोटाका तीन सन्तान मध्येका कान्छो सन्तान हुन् । सुष्मा र प्रदिप चेतनाथ फुयाँलका तीनसन्तान मध्येका दुईसन्तान हुन । दुवै घरमा एकैपटक काजक्रिया चलिरहेको छ । ‘काजक्रियाको एघारौ दिन भैसक्यो, घटनाको अत्तोपत्तो छैन, दोषी पत्ता लाउन सकेका छैनन्,’ पीडित रविन्द्र सापकोटाले भावविह्वल हँुदै भन्नुभयो, ‘छोरो त कहिल्यै नफर्किने गरी चुडियो, न्याय पाउने आशा पनि टुटेजस्तै लाग्न थालेको छ ।’
रन्जिवकी आमा ३८ वर्षकी सीता सापकोटाका पनि आँशु थामिएका छैनन् । ७२ वर्षकी हजुरआमा कौशिला सापकोटा १२ वर्षदेखि रोगी भएर ओछ्यानमा थलिएकी थिइन् । नातीलाई हत्या गरेको सुनेदेखि मुर्छा परेकी उनी होसमा आउँने हुन या हैनन पत्तो छैन । कलकलाउँदा बालखा सन्तानको हत्या भएदेखि छिमेकी दुवै घरमा रुवाबासी रोकिएको छैन । अनुसन्धानले हत्यारा पत्ता लाउन नसकेपछि अरुण गाउँपालिकाका बासिन्दा जीवन सुरक्षाका लागि हारगुहार गरिरहेका छन् । ‘मर्ने त मरेर गए, बाँच्नेका आँसु थामिएनन्, बाँच्न पनि गाह्रो भैसक्यो,’ सुष्मा र प्रदिपका ३४ वर्षकी आमा निर्मला फुयाँल रुदै भन्नुहुन्छ, ‘अपराधीहरुले छोराछोरी सखाप पारेरै छाडे, चाडै न्याय दिलाइयोस् ।’
सुरक्षाकर्मीको अगाडि भयो घटना

द्वन्द्वकालमा समेत यहाँका नागरिकलाई सुरक्षाको समस्या थिएन । इलाका प्रहरीमा ७ जना प्रहरीले धान्दै आएका थिए । स्थानीय तह निर्वाचनताका नेपाल प्रहरी, नेपाली सेना, सशस्त्र र म्यादी गरी ढेडसयको गस्ती खटिरहेका बेला शंकास्पद ढंगले जघन्य घटना घटेपछि आतंक मच्चिएको छ ।
यस्तो अपत्यारिलो घटना राज्यका लागि चुनौती भएको भन्दै दोषीमाथि चाडो छानविन हुनुपर्ने स्थानीय रुद्रबहादुर खत्रीले बताउनुभयो । ‘त्रासैत्रास छ, साँझ परेपछि घरबाहिर कोही निस्कदैनौँ, ढोका थुनेर बस्छौँ, मेलापात जाँदा केटाकेटी साथै लिएर जान्छौँ । बसोबासका लागि एकदमै डरलाग्दो परिस्थिति सृजना भएको छ । अबोध बालबालिकाको निर्मम हत्याको घटनाले जोसुकैमा शंका उत्पन्न गराएको छ ।’
ओल्लो घर पल्लो घरका यी दुई परिवारको न कसैसंग रिसराग थियो । नत मनमुटाव नै । सापकोटा कृषि कार्यालयका कर्मचारी हुन् । उनी निर्वाचनमा सहायक मतदान अधिकृत भएर षडानन्दा नगरपालिकामा खटिएका थिए । तर घटना भएपछि खट्न सकेनन् । फुयाँल प्याउली बजारमा सामान्य फेन्सी पसल गर्छन् । ‘हामी पैसावाल पनि होइनौँ, कोहीसँग कसैखाले रिसराग थिएन । हजुर सन्तानै सखाप पारिदिए’ चेतनाथले भन्नुभयो ।
निर्वाचनको समयमा प्याउलीको नेपाल रेडक्रस सोसाइटीको भवनमा नेपाली सेना बसेका थिए । प्रत्यक्षदर्शीका अनुसार छिमेकका तीन सन्तान हराएका बेलुका रन्जिव र प्रदिप फुयाँल त्यस आसपास निस्किएका थिए । त्यसपछि गायव भए । सुष्मालाई सिरकको खोल लगाउँदै घरैमा खाना पकाउन बाबुआमाले अह्राएका थिए । अचानक बेपत्ता भएका उनीहरुलाई खोजविन गर्दा भेटिएनन् । तर, तेस्रो दिन पोखरीमा एकै ठाउँ डुबेको अवस्थामा मृत फेला परे तीनैजना ।
फेला परेका दिन नै अनुसन्धानका लागि सहायक प्रमुख जिल्ला अधिकारी राजन पाण्डेको नेतृत्वको टोली र अञ्चल प्रहरी कार्यालय धरानका एसएसपी उत्तमकुमार कार्कीको नेतृत्वको टोलीले घटनाबारे सोधपुछ गरेका थिए । लाशको पोष्टमार्टमका लागि विपी कोइराला विज्ञान प्रतिष्ठान धरान लगिए पनि अहिलेसम्म कुनै रिपोर्ट सार्वजनिक गरिएको छैन । प्रत्यक्षदर्शीका अनुसार तीनजनैका मुखमा ५–६ वटा कपडाका पोका खाँदिएको थियो ।
जिल्ला प्रहरी कार्यालय भोजपुरका प्रहरी नायव उपरीक्षक काजीकुमार आचार्यका अनुसार घटना थाहा भएबाटै स्थलगत अनुसन्धन भैरहेको छ । क्षेत्रीय अनुसन्धान व्युरो विराटनगरका प्रहरी निरीक्षक खगेन्द्र खड्काको नेतृत्वमा ५ जनाको टोलीले निरन्तर घटनास्थलको अनुसन्धान गरिरहेको छ, सादा पोसाकमा समेत प्रहरी खटाइएका छन्, तर घटनाबारे भन्न सक्ने कुनै तथ्य छैन । पूर्व क्षेत्रीय प्रहरी कार्यालयका डिआइजी रमेशराज भट्टराईका अनुसार क्षेत्र र जिल्लाको टिम अनुसन्धानका लागि निरन्तर भिडिरहेका छ । उहाँका अनुसार भिसेरा टेष्ट गर्नुपर्ने भएकाले पोष्टमार्ट रिपोर्ट आउन केही समय लाग्नेछ ।
‘टेष्टका लागि केन्द्रीय विधि विज्ञानमा पठाइएको छ, अनुमान धेरै कोणबाट गरिएको छ, भिसेरा टेष्ट आएपछि अन्तिम निष्कर्ष आउँछ,’ फोनसम्पर्कमा उहाँले भन्नुभयो । घटनाले जिल्लाभर स्तब्ध बनाउनुका साथै विद्यार्थी, बालबच्चा र अभिभावकमा मानसिक सन्त्रास फैलाएको छ ।
‘छानविन चाडो हुन सकेन भने गाउै बसाई सरेर हिँड्ने मानसिकता धेरैले बनाइसके, दोषीलाई पत्ता लगाएर कारवाही हुनुपर्छ,’ शारदा मावि प्याउलीका शिक्षक तिलक पुलामी मगरले बताउनुभयो । जिल्लास्थित महिला तथा बालअधिकारकर्मीको समेत ध्यानाकर्षण भएको छ । नियोजित रुपमा घटना भएको भन्दै चाडो भन्दा चाडो अनुसन्धान हुनुपर्ने र शान्ति, सुरक्षाको आभास दिलाइनुपर्ने उनीहरुको माग छ ।